HEZKUNTZA ARLOKO ZABALTZEA (Zesta punta eskolaren ingurunean zabaltzea): Lehen Hezkuntzako eta Bigarren Hezkuntzako ikasleei zesta punta jokoa irakastea da proiektu honen helburua. Unitate didaktikoen bidez ikasleek ezagutuko dute nola jaio eta nola zabaldu zen zesta punta mundu guztian. Ikastetxearen egoerari egokitutako materialak erabiliz, hezkuntza jarduera horretako parte hartzaileek “tresna jantziko” dute, eta plastikozko zesta bat erabiliz pilota hartzeko eta jaurtitzeko praktikak eginen dituzte. Halaber, Jai Alairen berariazko terminologia ezagutuko dute, baita ere pilotari batek zer balore, arau eta jarduera dituen kantxara jokatzera ateratzen denean. Azkenik, parte hartzaileek kantxetan transmititzen diren esanahi onartuak ezagutuko dituzte eta, horrela, gure herriaren kultur nortasunaren ezaugarriak identifikatuko dituzte.

Praktika horiek “jarduera osagarriak” deiturikoetan eginen dira eta, hortaz, eskola orduetan.

    KULTUR ZABALTZEA (Zesta punta kultur adierazpen gisa zabaltzea) :

Bigarren proiektu hau zesta punta publiko berri baten aurrean eszenaratzen saiatuko da. Urtero, hainbat arrazoirengatik, milaka eta milaka turista iristen dira gure lurraldera. Denak harritzen dira gure kultura eta ingurunearen ezaugarriekin. Munduko beste guztiak ez bezalakoak diren esanahiekin eta kulturarekin jartzen dira harremanetan. Zesta punta, kultur eta kirol adierazpen gisa, ikuskizun erakargarri, errepika ezin eta ikusgarria zaie denei, eta lehen aldiz ikusten duen guztiaren arreta bereganatzea lortzen du. Kultur zabaltze proiektu horren bidez zesta punta turismoari erakutsi nahi diogu. Horretarako, ikusle berri horientzat pilota partidak eta kinielak eginen dira. Jarduera horiek aldez aurretik programatuko dira eta “ad hoc” eginen, hau da, elkartutako ikusleen arabera diseinaturik: kongresuak, konbentzioak, jardunaldiak, turistentzako jarduera osagarriak... “Eszenaratze” hori ondoko hauekin osatuko da: speaker a, merchandising denda, beste kultur adierazpen batzuk (dantzak, herri kirolak...). Azkeneko helburua da zesta puntarako merkatu berri bat irekitzea, eta Jai Alaiko frontoiak beteko dituen publiko berri bati atsegin ematea. Horrela, inguruko klubetako pilotariak lehian sartu ahal izanen dira.

    AISIALDIAN ZABALTZEA (Zesta punta aisialdiko jarduera gisa zabaltzea) :
.Ikerkuntzari esker eta material berriak erabiltzearekin, zesta eta pilota mota berri bat asmatzea lortu da. Horien produkzioa metodo industrialetan oinarritzen da, eta beren kostua, erabilera eta eskuragarritasuna edozeinentzako modukoa da. Beraz, EUSKAL JAI ALAIAk zesta puntaren praktika bultzatu eta dinamizatu nahi du lehendik Jai Alairekin harremanik ez dutenen artean eta, hortaz, zesta punta praktikatzen duten pilotariek izaten ohi dituzten zaletasun, interes eta motibazioak ez dituztenen artean.

Gainera, lehiaketetatik kanpo adinarengatik edo beren egoera pertsonalarengatik gelditu diren zesta puntako pilotarientzat EUSKAL JAI ALAIAk jarduerak antolatu nahi ditu, zesta punta denbora pasa eta hobby gisa praktikatzen jarraitu ahal dezaten.

    KIROL ARLOKO ZABALTZEA (Zesta punta kirol lehiaketa gisa zabaltzea) :
. Proiektu hau saiatuko da kirol lehiaketak bultzatzen, edozein arrazoi dela-eta lurralde federazioek lehiaketak programatzeko erabiltzen ez dituzten kantxa horietan hain zuzen ere. Hau da, programazio zehatzik ez duten data eta lekuetan txapelketa “ez ofizialak” dinamizatzeari eta sortzeari buruz ari gara.

Ildo beretik, EUSKAL JAI ALAI zesta puntarekiko interesa duten frontoi horietan partidak eta kinielak programatzen saiatuko da; batez ere saiatuko da Jai Alai saioak herri eta hirietako jaietan programatzen.

    JAI ALAIREN HISTORIA ZABALTZEA (Zesta puntaren historiaren ikerketa eta argitaratzea)
.Zesta puntak istorio eta pasarte asko sortu ditu. Horietako batzuk ikertu eta argitaratu dira, baina Jai Alairen historia handia idatzi gabe dago oraindik. Bestalde, badira gutxienez bi datu base, pertsona ezezagunek egindakoak; horietan profesional izan diren pilotari guztien izenak eta zer frontoitan jokatu duten jaso da. EUSKAL JAI ALAIREN azken proiektu honek behar diren mekanismoak lotu beharko ditu informazio hori dena argitaratzeko.

Azkenik, EUSKAL JAI ALAIREN proiektu honek asmoa du zesta puntako eskoletan erabiltzen diren entrenamendu tekniken berrazterketa gaurkotua argitaratzeko.